close
2008年4月27日(星期日) - 天朗氣清
今日正式會離開褔崗, 而係香港買定既5 days JR pass亦會今日起開始用, 5天乘車証共售16,000yen, 係香港買仲有95折, 真係好抵. 朝早8點起身, 係酒店食埋早餐, 就出發la. 係度講一講呢間酒店博多グラン水晶ホテル既早餐, 雖然只係有幾款麵飽同雞蛋, 而飲品係果汁同鮮奶, 但係味道都幾好, 特別牛角飽, 雖然間房都幾細間同張床真係幾細張, 不過6000yen一晚包埋早餐都算好抵.
酒店既早餐
酒店門口
去到JR博多站, 因為之前果日已經搭過, 所以大概知道月台顯示牌係點樣睇, 好快就搵到個月台, 為左可以保留返張JR ticket, 係入閘時只係拎個JR pass出黎俾個檢票員睇, 當自己係搭自由席, 其實我地係搭指定席, 因為拎住張JR pass搭自由席係唔需要換飛, 當然出閘時都只係拎張JR pass俾檢票員, 如果唔係佢會收左你張飛. 而日本既JR係以準時出名, 所以好多時都寧願早到, 如果錯過左班JR, 可能要等好耐先有下班車, 因為佢地班次好疏. JR好準時係9:04am開出, 今日既行程都幾趕, 首先去左小倉行小倉城, 之後再搭JR去別府.
我地就係搭呢架JR去小倉
西小倉站前(其實都無咩人係條街)
去到小倉站, 先搵locker放低行李, 好好彩搵到一個大既locker, 可以一次過放2個行李箱, 盛為500yen. 之後再搭JR去西小倉站(由於西小倉係一個細站, 怕會無咁多locker, 但係真係好似無locker, 好彩啫), 由西小倉站行大約7分鐘左右, 就到達小倉城, 第一次去日本既城樓, 應該同中國既好大分別. 行完小倉城之後 (可能自己對日本既歷史唔係咁清楚, 加上又全部係日文, 真係唔知講緊咩, 不過叫話行過啦), 就去附近既商場Riverwalk Katakyusho行下同埋食野, 呢個商場都幾多野睇, 而商場地庫有間Gourmet City Supermarket 同埋100yen店, 我地係果度都買左好多野食, 當然唔少得既士多啤梨la. 由於係surpermarket逗留太耐, 無時間行其他鋪頭....食完野之後, 就要趕去小倉站搭JR去別府, 由Riverwalk行去小倉站12-13分鐘 (本身小倉站同西小倉站都好近).
小倉城
我地既午餐-拉麵
小倉站前
其實我地的目的地係別府大學站既別府海浜砂湯, 但JR會係別府站等23分鐘先可以轉車去別府大學, 所以我地就利用呢段咁短既時間, 盡快去酒店放低行李, 再返去別府站搭車, 但係其實都怕會趕唔切, 因為由別府站行去酒店大約要8分鐘, 我地都只係諗住將行李放係酒店個Receiption度, 但如果酒店既人唔識聽英文就唔知要攪幾耐, 如果趕唔切, 就要取消去別府海浜砂湯, 因為佢既開放時間只係去到下午5點, 但好好彩, 酒店既人聽得明我地講既野, 放低行李之後, 我地即時趕返別府站, 搭JR去別府大學站.
別府大學站前
呢個就係我地要去既地方啦
別府大學站, 呢個站真係細得好緊要, 好似香港既電車站差唔多, 由JR站行大約8分鐘就到達別府海浜砂湯. 這裡是以溫泉熱加溫的海砂埋住成身, 一邊望住太平洋, 一邊俾海砂埋住焗十至十五分鐘, 藉著發汗作用, 有治療痛症, 行氣活血的功效. 係呢個砂場裡面, 我地遇見左一個係大陸嫁黎日本既女仔, 係日本居然有人同我地講國語, 個感覺都幾得意, 佢仲好好人咁幫我地影相.
俾海砂焗住, 要等十五分鐘, 好熱呀!!
呢個就係太平洋啦
當無人係度砂湯時, 溫泉水會浸滿成個砂池
免費既足湯
焗完砂之後, 仲可以係砂場隔離享受一個免費足湯, 又可再一次一邊浸足湯, 一邊欣賞太平洋, 期間好多本地人都黎享受呢個免費足湯.
焗完砂, 浸完腳之後, 就返酒店醫肚先, 由別府大學站搭JR返去別府站只係需時4分鐘, 之前去到別府站時, 由於太趕, 根本無時間睇下周圍環境, 係別府站前, 又有一個免費既手湯, 真係符合湯之國呢個名. 別府站隔離都有一間好大間既Gourmet City Supermarket, 早知唔駛係小倉買la, 山長水遠拎到黎....行左一陣之後, 就返酒店安頓, 由於今晚既酒店係一泊兩食, 所以晚餐唔駛愁, 晚餐有四間餐廳選擇, 我地當然選左日本餐廳, 果然無選錯, 好豐富同味道係水準之上.
別府站前既免費手湯
豐富既晚餐
食完飯之後, 費時即刻浸溫泉, 所以出去行下, 同埋發覺到原來帶黎既2gb ram已經full memory....只係第三日...唯有出去睇下有無得買memory card, 好彩別府站隔離有一間百貨公司, 有得賣memory card. 嘩! 價錢貴過香港成倍, 但係都無計, 都迫住要買...唉....買完之後, 就返酒店浸溫泉la, 酒店既溫泉不過不失. 不過有一個奇遇, 當我地浸完溫泉之後, 係溫泉個lobby玩緊個按摩椅時, 有個日本男人無端端去汽水機度買左支水俾我地飲, 雖然佢唔識英文, 我地唔識日文, 但係佢好似叫我地浸完溫泉要飲多d水咁...haha..
返到酒店房之後, 當然要食今日買既士多啤梨先la, 因為尋日搵左好耐都搵唔到士多啤梨, 所以今日一見到即刻買左, 點知之後又係別府見到有得賣, 真係激死, 不過...d士多啤梨真係好好味呀....
參考資料:
小倉 - 北九州市觀光課, 北九州觀光協會
別府 - 別府市觀光課, 別府市觀光協會
全站熱搜
留言列表
我的旅遊日記 (19)
