內奧咪部落格

之前係周大褔買左龍鳳鈪同豬牌後, 其實仲要買埋龍鳳耳環同戒指. 其實如果周大褔有我鍾意既款, 我諗我會係周大褔. 因為果時我用citibank credit card簽，仲要分開3張Citibank credit card簽, 同埋再分開2個月俾錢, 我最後計過可以有$3,600回贈, 仲有因為我係popcorn果度用it credit card消費, 再有$120回贈. 真係好抵. 不過如果再要係係周大褔買耳環同戒指, 就要申請多2張Citibank credit card先得. 其實我想要既龍鳳耳環同戒指款式好簡單, 周生生同六褔都有，只係周大褔無. 無計啦, 再係第二間買啦.

其實周生生同六褔既款都差唔多, 不過個人感覺周生生手工靚d, 手工費未折之前差唔多. 但係上網睇到周生生手工費最多只有六五折, 而六褔係網上我見到可以去到全免手工費, 當然果個人買左好多野. 咁我又唔會諗住R到免手工, 不過都應該R到d折頭, 而且而家用HSBC credit card去時代廣場同新城市廣場消費, 有15x獎賞錢回贈, 一個星期最多有$200獎賞錢, 所以我地一早鎖定係新城市廣場買金, 因為果度有周生生同六褔. 其實一直都有留意金價既走勢, 自從上次買完金後, 金價都沒有下跌過, 而且都有上升. 其實之前一直都諗住去新城市廣場買金, 但公司一直都好忙, 未有時間. 但HSBC既credit card優惠只係做到30/8, 我一定要係30/8之前買先得. 但係近排金價一直都很高, 上個星期更加試過去到$17,050, 嘩.... 金價好似無意慾回一回咁, 之後跌返$16,950, 我都想一直等, 可能又就快到30/8啦, 無計, 到30/8都仲係$16,950, 算啦, 買左佢啦.

我地係30/8特登去新城市廣場度, 其實我地有目標既, 如果六福俾唔到平折頭就走去周生生買, 橫店2間金鋪都係對面. 好彩今日係星期四, 唔係好多人, 容易D講價. 其實一開始我入去時, 佢地只係肯俾VIP價, 即5折, 但係經過BF既三寸不爛之舌, 居然可以俾到一個好優惠既價我地, 真係估佢唔到, 不過耳環同戒指既手工費都唔係好多錢, 所以就算平, 都唔係平左好多錢, 但係唔理啦, 平得一蚊得一蚊ma. 而且我地分開2張HSBC credit card碌 (我同BF各用一張), 咁就有$400奬賞錢回贈. 雖然係幫媽咪買俾我, 但我都唔想媽咪用咁多錢, 話晒而家d金咁貴. 點都好, 都要多謝媽咪呢.

特別一提, 我地買完金後, d金價又再升左, 今日仲升到$17,280, 嘩... 真係唔多掂啦, 再係咁, 再加埋如果美國出埋QE3, 睇黎都好快會去到$20,000. 真係無眼睇.....